ஹைகூ கவிதைகள்- இறையன்பு

ஜூலை 10, 2010

இறையன்பு அவர்கள் எழுதிய ”முகத்தில் தெளித்த சாரல்” புத்தகத்திலிருந்து….

தலைப்பு: வெட்டுப்பட்டால் பெட்டிக்குள்…

கருப்பொருள் ஹைகூ கவிதை:

“பெட்டிக்கு வந்த பிறகு

எல்லோருமே சமம்-

சதுரங்கக் காய்கள்” – ISSA

ஆங்கில மொழி பெயர்ப்பு:

Once in the box

everyone of them equal in the Chess pieces – ISSA

இறையன்பு அவர்கள் ஹைகூ கவிதை:

சதுரங்கக் காய்களில்

ராணிகளுக்குத் தான் மதிப்பு

அவற்றால் தான் யாரையும்

எப்படியும் வெட்ட முடியும்-

கவிழ்க்க முடியும்-

அழிக்க முடியும்.

மேலோட்டமாகப் பார்த்தால்

ராஜாக்களுக்குத்தான் சக்தி அதிகம்.

ஆனால் அந்த சக்தியைக்

கூட்டுபவர்களாகவும்

குறைப்பவர்களாகவும்,

குலைப்பவர்களாகவும்

இருப்பவர்கள் எப்போதும்

ராணிகளாய் இருக்கிறார்கள்.

சாம்ராஜ்யங்கள் பல சரிந்ததற்கு

ராஜாக்களைக்காட்டிலும்

ராணிகள் தான் காரணம்.

எவ்வளவு வலிமை பெற்ற சதுரங்கக்

காயாக இருந்தால் என்ன?

அது இருக்கும் இடத்தில் தான்

அதன் சக்தி

தீர்மானிக்கப்படுகிறது.

மூலையில் முடங்கினால்

ராணியைச் சின்ன கூனி கூட

வீழ்த்தலாம்

என்பதற்கு ராமாயணம்

மட்டுமல்ல

சதுரங்கமும் சான்று.

பக்கவாட்டிலேயே நகர்ந்தால்

நேரே வரும் பிரச்சனைகளை

எதிர்கொள்ளும் திராணி

இருக்காது என்பது

பிஷப் மூலமும்

நேரடியான எதிரிகள் மீது

மட்டுமே

கவனமிருந்தால்

மறைமுக ஆபத்துகள்

விழிகளுக்குத் தெரியாது

என்பது ரூக் மூலம்

வெளிப்படும்

வாழ்க்கைத் தத்துவம்

சதுரங்கத்தில் புலப்படும்.

சின்னச் சின்ன வெற்றிகளுக்கு

ஆசைபடாமல்

திடமான இலட்சியத்துடன்

இறுதிவரை

பயணிப்பவன்

சிப்பாயின் நிலையிலிருந்து

மிக உயர்ந்த நிலைக்கு மாற

முடியும்

என்பதற்குக் கடைசிக்

கட்டத்தில் சிப்பாய் நிலை உயரும்

காட்சியே சாட்சி.

சதுரங்கம் விளையாட்டு

மட்டுமல்ல வாழ்க்கையைக் கற்றுத் தரும்

போதனை.

இதுவரை போனவை போகட்டும்

இனிமேலாவது

விழிப்புணர்விருந்தால் போதும்.

எத்தனை காய்கள் என்பதிலும்

எப்படி அவற்றை

உபயோகப்படுத்துகிறோம்

என்பதே சூக்குமம்.

ஆனால் விளையாடி முடிந்த

பிறகும்

சதுரங்கம் கற்றுத்தருகிறது-

பெட்டிக்குள் போன பிறகு

காய்கள் எல்லாம் சமம்தான்

என்கிற உண்மையை.

மரணம்

எல்லோரையும் சமமாக்குகிறது.

அமைதியாக்குகிறது.

ஆனால்

அதற்கு முன் நடக்கும் நிகழ்வுகள்

தான்

முக்கியமானவை.

பெட்டிக்குள் போனால்

ஒன்று தானே

என்பதால் சதுரங்கக்காய்கள்

சும்மா இருப்பதில்லை.

இன்னும் சொல்லப்போனால்

சதுரங்கக் காய்களுக்கு ஏது

மரியாதை?

அது நம்மிடம் இருந்துதான்

ஆரம்பமாகிறது.

எதற்கு அதிக அதிகாரம்

என்பதை நாம் தான்

தருகிறோம்-

நம்மிடமிருந்து அதிகாரத்தை

அவை எடுத்துக் கொள்கின்றன.

நமது ராஜாக்களுக்கும்

ராணிகளுக்கும்

நம்மிடம் இருந்தே அதிகாரம்

அளிக்கப்பட்டிருக்கின்றன.

பல திறமைகள்

பெட்டிக்குள் முடங்கிக்

கிடக்கின்றன

உரிய களம் இல்லாமல்

நல்ல தளம் இல்லாமல்

பெட்டி என்பது

சதுரங்கப்பெட்டி மட்டுமல்ல-

சவப்பெட்டி மட்டுமல்ல

ஆற்றலை சிறைப்படுத்தும்

அனைத்துக்குமே

அவை பொருந்தும்.

Advertisements

சுயம் போற்றி…தன்னம்பிக்கையூட்டும் கவிதை

ஏப்ரல் 10, 2010

முழுக்கவிதையும் seshadrir.com இணையத்தில்…

மேலே உள்ள படத்தினை கிளிக்கி படிக்க.


தேசப்பற்று-இன்று!

மார்ச் 27, 2010

படித்த இளைஞனே!

வா!

படித்து விட்டாயா?

வந்தவுடன் என்ன அவசரம்?

ஜார்ஜ் புஷ் உன் கனவில் வருகிறாரா?

பில் கேட்ஸ் உன் முன் மாதிரியா?

சரி நீ!

இந்திய இளைஞனே தான்!

இந்தியாவை விட்டுப்

போய் விட வேண்டும் என்ற எண்ணம்

இந்திய இளைஞனைத் தவிர

எந்த இளைஞனுக்கும் வராது!

உன் அதிகபட்ச இலட்சியம்

ஆறாயிரம் மைல்கள் தாண்டிய

அமெரிக்கா!

உன் குறைந்தபட்சஇலட்சியம்

இரண்டாயிரம் மைல்கள் தாண்டிய

அரேபியா!

வயிற்றை

இந்தியாவில் நிரப்பிக் கொண்டு

மூளையை

அயல் நாட்டில் விற்கப் போகிறாய்!

உன்னை

இந்தியப் புழு என்றால்

அழுவாய்!

அமெரிக்கப் புழு என்றால்

ஆனந்தமாவாய்!

அமெரிக்க-பிரிட்டிஷ்

தூதரக சாலைகளை

நடந்து நடந்து தேய்ப்பாய்!

ஒரு வழியாய் பயணமாவாய்…

அதுவும்

இந்தியன் ஏர்லைன்ஸ் என்றால்

“ச்சீ” என்பாய்!

என்னே உன் தேசியப் பற்று!

நீ இந்தியத் தாயின்

கண்ணில் விழுந்த

தூசி அல்ல…ஊசி!

உனக்கு சின்ன வயதில்

சுதந்திர தினத்தன்று

தேசியக் கொடியை

குண்டூசியால் சட்டைப் பையில்

குத்தியிருக்கக் கூடாது!

ஒரு ஆணி வைத்து

இதயத்தில் அடித்திருக்க வேண்டும்!

—-யாரோ.

Tamilish தளத்தில் வாக்களிக்க இங்கே கிளிக்கவும்.

Recent Posts:

Earth Hour 2010, March 27-08:30 PM to 09:30 PM

Scientific Information- அறிவியல் பற்றிய தளங்கள்

தினமணி இணையதளத்தில் உங்கள் வலைப்பூ

IPL 20-20 Videos Hatrick Wickets

இணையத்தில் வாக்காளர் பட்டியல்

Quit Smoking…புகைப்பதை நிறுத்துங்கள்!

CII Sohrabji Godrej Green Business Center Hyderabad


மகோன்னதம்

ஜனவரி 27, 2010

நான் முட்டிக் கொண்ட
போதெல்லாம் உடைந்து
போனது என் தலை மட்டுமல்ல…
வெற்றியின் கட்டுத் தளைகளும் தான்…

நான் விழுந்த போது
தேய்ந்து போனது
என் முகம் மட்டுமல்ல
தோல்வியின் அகமும்!

எத்தனையோ இரவுகள்
எத்தனையோ விளக்குகள்
ஆனாலும் எனது
கண்கள் எப்போதும்
வெற்றியின் ஒளியை நாடியே!

புயலும்… பூகம்பமும்…
என் வீட்டு வாசலில்
இடியும் மழையும்…
என் வீட்டுக் கூரையில்!

ஆனாலும் நான்
நிம்மதியாகவே உறங்குகிறேன்
நம்பிக்கை என்னும் போர்வைக்குள்!

வானத்து நட்சத்திரங்களுக்கும்
ஒட்டடை தட்டும் வல்லமை வாய்ந்தவை
என் கரங்கள்

நான் உமிழ்ந்தால்
சூரியனும் உறைந்து போகும்
நான் பெருமூச்செறிந்தால்
எட்டுத் திக்குகளும்
இடம் மாறிப் போகும்.

என் பிரியமான தோல்விகளே
பிரபஞ்சத்தின் பால்வீதி மண்டலத்தை மடித்து
சட்டைப் பைக்குள் பத்திரப்படுத்திக் கொள்ளும்
திறம் வாய்ந்த என் மீது
உங்களால் நகக் கீறல்
கூட ஏற்படுத்த முடியாது…

நம்பிக்கை விந்துவால்
கருவானவன் நான்.

என் கல்லூரி நண்பர்:வேதான் “வினோத் பாபு”

இவரது மற்றொரு கவிதை: வளைவுச் சாலைப் பயணம்!

Tamilish தளத்தில் வாக்களிக்க இங்கே கிளிக்கவும்


நீரின்றி அமையாது…

ஜனவரி 27, 2010

நீரின்றி அமையாது…

நீரிடமிருந்து நீ

கற்றுக்கொள்ள வேண்டியது

நிறைய இருக்கிறது

அருவி நீரைப் போல

வீழ்ந்தாலும் சோர்ந்து விடாதே!

நதி நீரைப் போல

நில்லாமல் ஓடிக் கொண்டேயிரு!

அணை நீரைப் போல

ஓரிடத்தில் தேங்கி விடாதே!

கடல் நீரைப் போல

எப்போதும் ஓயாமலிரு!

– ராம்மோகன்


அடிப்படை அவசியங்கள்; EHMAN; 1972

ஒக்ரோபர் 24, 2009
DESIDERETA

அடிப்படை அவசியங்கள்; EHMAN; 1972

ஞானியரின் ஞானத்தைக் கேள்!
அவசர இரைச்சல் இடையே
அமைதியாகச் செல்.

மௌனத்தின் நிம்மதியை நினைவில் கொள்
முடிந்த வரை சரணடையாமல்
அனைவருடனும் நல்லுறவு கொள்.

உன் உண்மையை
இதமாகத் தெளிவாகக் கூறு
பிறர் கூறுவதைக் கவனி
மந்த மூடர்களாயிருப்பவரிடமும்
சொல்வதற்கு அவர்களிடம்
ஒரு கதை உண்டு.

உரக்கப் பேசுபவர்களையும்
ஆத்திரக்காரர்களையும் தவிர்
அவர்கள் உள்ளத்தில்
வெறுப்பை உருவாக்குபவர்கள்.

பிறருடன் ஒப்பிட்டால்
உனக்குக் கசப்பும் சலிப்புமே மிஞ்சும்.

உன்னை விடவும்
உயர்ந்தவர்களும், தாழ்ந்தவர்களும்
எப்போதும் உண்டு.

உன் சாதனைகளை மகிழ்வுடன் அனுபவி
அதே நேரத்தில்
உன் திட்டங்களையும்
மகிழ்ச்சியோடு அணுகு.

உன் வாழ்வின் பாதை
எவ்வளவு சாதாரணமாக இருந்தாலும்
அதில் ஆர்வம் கொள்.

கால மாற்றங்களில் இதுவே
உனது நிரந்தரச் செல்வம்.

தொழிலில் எச்சரிக்கையோடிரு.
உலகில் ஏமாற்றல்கள் அதிகம்,
அதனால் நன்மைகள் இருப்பதை மறுக்காதே.

உழைப்பவர் பலர்
உலகம் முழுவதும் வெற்றிக்கான
வீர முனைப்பு இருக்கிறது.

நீ
நீயாக இரு.
அன்பு காட்டுவதாய் நடிக்காதே.
அன்பை ஏளனப்படுத்தாதே.

எல்லா விரோதங்களுக்கும்
ஏமாற்றங்களுகும் அப்பாலும்
அன்பு ஒரு நிரந்தரப் பசுமை.

வயதுகளின் ஆலோசனையை அனுமதி.
இளமையின் வேகத்தை நிதானமாக்கி,
உள்ளே உரம் பெறு,
பலம் பெறு, இது எதிர்பாரா தாக்கங்களிலிருந்து
உன்னைப் பாதுகாக்கும்.

மிகையான கற்பனைகளால்
மனதை வருத்திக் கொள்ளாதே
அசதியும் தனிமையும்
அச்சங்களைப் பிரசவிக்கும்

முழுமையான கட்டுப்பாடுடன்
உனக்கு நீயே
சலுகைகள் எடுத்துக் கொள்.

நீ
இந்தப் பிரபஞ்சத்தின் குழந்தை
மரங்களுக்கும், நட்சத்திரங்களுக்கும்
உள்ளது போலவே உனக்கும்
இங்கே உரிமைகள் உள்ளன.

புரிந்தாலும் புரியாவிட்டாலும்
பிரபஞ்சம் தன் விதிப்படியே
இயங்கிக் கொண்டிருக்கும்

உன் உழைப்பும் கனவும்
எதுவானாலும்
உள்ளே உனக்கோர்
இடம் செய்து கொள்.

பொய், புரட்டு, பகற் கனவுகளை மீறி
உலக அழகானது தான்.

இன்புற்றிரு,
இன்புற்றிருக்க முனை.

1972 ஆம் ஆண்டின் இந்த தன்னம்பிக்கை ஊட்டும் கவிதையினை
அளித்து உதவிய ”இளைஞர்” நரேந்திரன் அவர்களுக்கு நன்றிகள்….


வாழ்க்கை என்பது கடமையடா!

ஓகஸ்ட் 29, 2009

வாழ்க்கை என்பது கடமையடா – அதில்
வாழ்ந்து பார்ப்பது உரிமையடா!
இன்பமும் துன்பமும் குமிழிகளே -அவை
இரண்டும் இங்கே நிலையில்லை!

இன்பம் வந்தால் துள்ளாதே – அட
இன்னல் வளைத்தால் துவளாதே!
இரண்டையும் ஒன்றைக் கருதிவிடு –
இன்னலை இங்கே ஊதிவிடு!

இந்தச் சமநிலை தேவையடா – அது
இல்லை என்றால் குழப்பமடா!
என்றும் வேண்டும் நம்பிக்கை — அதை
இழந்தால் நாமோ வெறும்சக்கை!

காக்கை குருவி எறும்புகளும் – இந்தக்
காசினி மீதில் வாழ்கிறது!
ஊற்றாய் ஊறும் பகுத்தறிவை — ஏந்தும்
உன்னால் வாழ முடியாதா?

நேற்று என்பதை அழித்துவிடு – உலகில்
நாளை என்பதை மறந்துவிடு!
ஏக்கந் தன்னை எடுத்துவிடு — கனியும்
இன்றில் வாழ எழுந்துவிடு!

மனிதா! மனிதா! மயங்காதே — இங்கே
மலைப்பின் பிடியில் சிக்காதே!
துணிச்சல் கொண்டு நடைபோடு — வாழ்வைத்
தூக்கிப் பிடித்தே எடைபோடு!

Thanks: http://www.eelanesan.com/tamil-ilakiyam/48-kavithai/134-life.html